[Versió oficial en friülès / Official version in Friulian]

PROPUESTE DI LEÇ REGJONÂL PAL INSEGNAMENT DE LENGHE FURLANE TES SCUELIS

ARTICUL 1
Finalitâts

1. La Regjon Autonome Friûl Vignesie Julie e ricognòs la lenghe furlane tant che patrimoni culturâl di no podê fâ di mancul dal so teritori e e calcole la scuele tant che strument di no podê lassâ di bande pe sô difese e pe sô difusion. E pense cun di plui che la educazion linguistiche, cu lis lenghis storichis dal teritori e cun chês altris lenghis europeanis, e sedi une sielte educative fondamentâl e che meti il furlan te didatiche dal plurilinguisim e dedi une oportunitât concrete pe sô valorizazion.

2. Tai principis dal come 1, la Regjon e promôf la valorizazion e la tutele de lenghe furlane cul insegnament tes scuelis, metint in vore ce che al è previodût tai articui 4 e 5 de Leç dai 15 di Dicembar dal 1999, n. 482 (Normis in materie di tutele des minorancis linguistichis storichis) e tal articul 1, come 2, dal decret legjislatîf dai 12 di Setembar dal 2002, n. 223 (Normis di metude in vore dal statût speciâl de regjon Friûl - Vignesie Julie pal trasferiment di funzions in materie di tutele de lenghe e de culture des minorancis linguistichis storichis te regjon).

3. Par un tant, la Aministrazion regjonâl, rispietant la autonomie scolastiche, e istituìs l'insegnament curicolâr de lenghe furlane, e promôf il coordenament tra i Istitûts scolastics individuant obietîfs, metodologjiis e proceduris uniformis pal insegnament de lenghe furlane, e viôt de formazion e dal inzornament dai insegnants, e cjape part, cu la Comission permanente pal insegnament de lenghe furlane, di intese cul A.R.Le.F. - Agjenzie regjonâl pe lenghe furlane e parie cul Ufici scolastic regjonâl, ai C.S.A. - Centris servizis aministratîfs e ae Universitât dai Studis di Udin, tal meti in vore la programazion prontade dai Istitûts scolastics pal insegnament de lenghe furlane te didatiche dal plurilinguisim, sostignint lis cjamis finanziaris che a ‘ndi derivin.

ARTICUL 2
Cjamp di aplicazion

1. Cheste Leç e cjate aplicazion tai ambits teritoriâi e subcomunâi delimitâts daûr dal articul 3 de Leç 482/1999.


ARTICUL 3
Comission permanente pal insegnament de lenghe furlane tes scuelis

1. Li dal Servizi identitâts linguistichis, culturâls e coregjonâi tal forest e je istituide la Comission permanente pal insegnament dal furlan tes scuelis, di cumò indevant nomenade Comission.

2. La Comission e je l'organisim incargât de Regjon par puartâ indevant la ativitât leade ae metude in vore di cheste leç, in particolâr par:
a) prontâ la propueste di regolament di metude in vore di cheste leç;
b) definî lis carateristichis pal acès, i criteris e lis modalitâts di davuelziment dal esam di abilitazion professionâl e la nomine de comission di esam;
c) tignî la Tabele professionâl dai insegnants di furlan - Liste professionâl dai insegnants di furlan dal articul 4;
d) analizâ i documents de programazion plurienâl dai Istitûts scolastics, par ce che al è previodût dal articul 11;
e) prontâ dute la modulistiche domandade pe aplicazion di cheste leç;
f) monitorâ il stât di metude in vore di cheste leç.

3. La Comission e riferìs a dadis regolârs ae Zonte Regjonâl e an par an al Consei regjonâl su la ande de aplicazion di cheste leç, prontant propuestis pe semplificazion des proceduris e la risoluzion des problematichis che dal câs a sedin vignudis fûr.

4. La Comission e je componude di:
a) doi membris individuâts dal Ufici scolastic regjonâl;
b) doi membris individuâts de Universitât dai Studis di Udin;
c) trê membris individuâts dal A.R.Le.F.

5. La Comission e je nomenade cun decret dal President de Regjon, e je rinovade ogni cinc agns e e reste in carghe par davuelzi lis funzions di cheste leç fintremai che e ven tornade a costituî.

6. Ai membris i tocje un gjeton di presince determinât tal decret dal come 4.

7. Lis funzions di segretarie de Comission a son fatis dal personâl in servizi li dal Servizi identitâts linguistichis, culturâls e coregjonâi tal forest.

8. La Comission si zove di doi esperts incargâts cun contrat di dirit privât pal davuelziment des ativitâts di istrutorie leadis aes funzions dal come 23.

ARTICUL 4
Insegnants di lenghe furlane

1. L'insegnament de lenghe furlane si fâs cun insegnants specializâts e insegnants specialiscj, iscrits te Tabele professionâl dai insegnants di furlan - Albo professionale degli insegnanti di friulano, istituît li dal Servizi identitâts linguistichis, culturâls e coregjonâi tal forest.

2. Par cheste leç si intint par “insegnant specialist” il laureât in materiis di aree linguistiche, leterarie o pedagogjiche o ben l'insegnant che al lavore li des scuelis de infanzie, primariis e secondariis di prin grât, che al dimostri di cognossi lis tecnichis dal plurilinguisim, di vê competence de lenghe furlane scrite e fevelade e di cognossi lis regulis de normalizazion grafiche e lessicâl.

3. Par cheste leç si intint par “insegnant specializât” il laureât o ben l'insegnant di cualsisei dissipline che al lavore li des scuelis de infanzie, primariis e secondariis di prin grât, che dimostri di savê comunicâ a vôs e par scrit te lenghe furlane di ûs ordenari e di vê competence tal lessic specific de sô dissipline, daûr dai criteris di normalizazion individuâts dal Osservatori regjonâl pe lenghe e la culture furlanis.

4. I insegnants che a lavorin tant che specialiscj o specializâts a vegnin incargâts cun contrat di dirit privât, ancje tra chei che a insegnin li dai singui Istitûts scolastics, daûr di modalitâts fissadis dal regolament di metude in vore di cheste leç e in conformitât cun ce che previodût dal CCNL in vore dal compart scuele e dai relatîfs Contrats Integratîfs.

ARTICUL 5
Abilitazion professionâl e formazion dai insegnants di lenghe furlane

1. A àn titul pe iscrizion ae Tabele professionâl dai insegnants di furlan - Albo professionale degli insegnanti di friulano ducj chei che a passin l'esam di abilitazion professionâl.

2. L'esam al è convocât su la fonde di un bant, prontât de Comission, che al determine lis carateristichis di acès, i criteris e lis modalitâts di davuelziment di chel istès e e nomene la comission di esam.

3. Par judâ a passâ l’esam di abilitazion professionâl, la Regjon e da di organizâ ae Universitât dai Studis di Udin specifics cors, sostignint i lôr coscj: par un tant la Regjon e promôf la stipule di convenzions specifichis cu la Universitât dai Studis di Udin pe individuazion des modalitâts e dai timps di realizazion dai cors di formazion.

4. La Zonte Regjonâl e determine, tal regolament di metude in vore di cheste leç, lis carateristichis domandadis e i titui che a coventin pe partecipazion ai cors, la cuantitât des oris di chei stes e i elements essenziâi dai programs didatics pai cors di abilitazion professionâl.

5. La partecipazion ai cors di formazion no je obligatorie pal acès al esam di abilitazion professionâl.

ARTICUL 6
Istituzion de ore curicolâr di lenghe furlane

1. La Regjon e garantìs ai arlêfs des scuelis primariis e des scuelis secondariis di prin grât l'aprendiment de lenghe furlane in conformitât cui metodis e cui obietîfs dal plurilinguisim, tant che segnâts tal Common European Framework for Languages: Learning, Teaching, Assessment - Cuadri comun european di riferiment pes lenghis:aprendiment, insegnament, valutazion publicât tal 2001 dal Consei di Europe e tal document elaborât, tal 2004, dal Osservatori regjonâl pe lenghe e la culture furlanis: Indicazions pe programazion didatiche curicolâr daûr de leç 482/99 - Indicazioni per la programmazione didattico - curricolare secondo la legge 482/99.

2. Par un tant la Regjon e istituìs, daûr dal articul 4 de Leç 482/1999, in dutis lis scuelis dal prin cicli cun sede tai Comuns dal articul 2, pe cuote dal curriculum regjonâl che i tocje daûr dal articul 2, come 1, letare l) de Leç dai 28 di Març dal 2003, n. 53 (Deleghe al Guvier pe definizion des normis gjenerâls su la istruzion e dai nivei essenziâi des prestazions in materie di istruzion e formazion professionâl), une ore di insegnament di lenghe furlane par setemane, par dute la durade dal an scolastic. Chest insegnament, che al torne dentri te cuote obligatorie de cariere scolastiche, al è intindût tant che moment specific di aprendiment, esercitazion e riflession su la lenghe furlane te prospetive di une educazion plurilengâl e, duncje, al covente che al sedi distint dal insegnament gjeneric de culture furlane.

3. L'insegnament de lenghe furlane daûr des modalitâts di chest articul al è fat dai insegnants specialiscj dal articul 4, come 2.

4. Il nivel di aprendiment de lenghe furlane al ven valutât e comunicât a dadis regolârs aes fameis, compagn di chês altris materiis curicolârs, te schede di valutazion dal arlêf.

ARTICUL 7
Aprendiment de lenghe furlane cul insegnament di altris materiis

1. La Regjon e promôf, tes scuelis primariis e secondariis di prin grât l'aprendiment de lenghe furlane cul so ûs strumentâl tal insegnament di almancul altris cuatri materiis curicolârs, e di chês une e à di jessi de aree linguistiche e une de aree sientifiche.

2. L'aprendiment de lenghe furlane te materie de aree linguistiche, si fâs cul ricors aes tecnichis de didatiche dal plurilinguisim, te misure di une ore par setemane e in compresince di un insegnant specialist.

3. L'insegnament de lenghe furlane in chês altris materiis, e tra chês une de aree sientifiche, si fâs te misure di almancul un tierç de cuantitât di oris anuâl de singule dissipline e, in dut câs, in unitâts didatichis completis e cumplidis.

4 L'insegnament de lenghe furlane cu lis modalitâts dal come 3 al pues jessi fat in mût diret dal insegnant de materie o dal ambit curicolâr, tal câs che specializât tal insegnament de lenghe furlane, o ben in compresince cuntun altri insegnant specializât.

ARTICUL 8
Insegnament de lenghe furlane tes scuelis de infanzie

1. La Regjon e promôf, tes scuelis de infanzie publichis e privadis parificadis, l'aprendiment de lenghe furlane cul so ûs strumentâl tal davuelziment des ativitâts didatichis, ludichis e ricreativis.

2. L'insegnament de lenghe furlane daûr dal come 1 si fâs te misure di almancul un tierç de cuantitât di oris anuâl e al pues jessi fat in mût diret dal insegnant, tal câs che al sedi specializât tal insegnament de lenghe furlane, o ben in compresince cuntun altri insegnant specializât.

ARTICUL 9
Sostegn des cjamis pal insegnament de lenghe furlane

1. La Regjon e sosten dutis lis cjamis a caric dai Istitûts scolastics pe realizazion dal insegnament de lenghe furlane daûr des modalitâts dai articui 6, 7 e 8.

2. La Aministrazion regjonâl e viôt dal rimbors dai coscj sostignûts dai Istitûts scolastics pe ativitât didatiche fate di bande dai insegnants specialiscj e dai insegnants specializâts tal câs che chescj a lavorin in compresince cul insegnant de materie curicolâr.

3. La Aministrazion regjonâl e ricognòs cun di plui ai insegnants specializâts che a doprin la lenghe furlane tes lôr oris di insegnament, daûr des modalitâts dal articul 6, une indenitât che e ven erogade tant che rimbors di spesis pe preparazion de ativitât didatiche.

ARTICUL 10
Programazion plurienâl dal insegnament de lenghe furlane

1. I Istitûts scolastics a programin, dentri tai lôr Plans pe Ufierte Formative (P.U.F.), dut il percors scolastic individuant, daûr des indicazions metodologjichis e dai obietîfs tignûts dentri tal document elaborât dal Osservatori regjonâl pe lenghe e la culture furlanis, Indicazions pe programazion didatiche curicolâr daûr de leç 482/99 - Indicazioni per la programmazione didattico - curricolare secondo la legge 482/99, i nivei di aprendiment di rivâ tes diviers classis in funzion dal nivel finâl di aprendiment, intindût tant che competence de lenghe furlane compagn di chê di chês altris lenghis insegnadis a scuele.

2. Par un tant, ogni scuele e pronte il so Plan plurienâl pal insegnament de lenghe furlane dulà che, daûr dai criteris di une programazion otimâl, su la fonde de modulistiche prontade de Comission e cuntune proiezion che e calcoli di rivâ ae fin dal cicli scolastic par ogni classe, a vegnin individuâts:

a) la progression par nivei dal aprendiment de lenghe furlane fintremai a rivâ al nivel finâl;
b) il numar di oris destinadis al insegnament de lenghe furlane daûr dai articui 6 e 7;
c) lis materiis curicolârs li che al vignarà fat l'insegnament de lenghe furlane daûr dal articul 7 e dal câs il numar di oris fatis in compresince cun altri insegnant specializât;
d) il numar di insegnants specialiscj e specializâts che al covente par davuelzi l'insegnament de lenghe furlane tant che al è specificât daûr des letaris b), c) e d) ca parsore;
e) i insegnants specialiscj e specializâts za presints tal organic dal Istitût scolastic.

ARTICUL 11
Metude in vore de Programazion plurienâl

1. La Comission e esamine i Plans plurienâi elaborâts in conformitât cul P.U.F. des scuelis, e determine lis dibisugnis di organic par meti in vore i Plans plurienâi, e individue la entitât des risorsis che a coventin e e comuniche i lôr dâts ae Zonte Regjonâl e al Ufici scolastic regjonâl.

2. La Zonte Regjonâl e individue lis risorsis a disposizion e e trasferìs i fonts che a coventin par inviâ l’insegnament de lenghe furlane.

3. Lis modalitâts e i tiermins par meti in vore lis proceduris dai comis 1 e 2 e ancje lis modalitâts pal afidament des incarghis ai insegnants specialiscj e specializâts, cjapant i nominatîfs des listis de Tabele professionâl dai insegnants di furlan - Albo professionale degli insegnanti di friulano a son determinadis de Zonte Regjonâl, daûr de propueste de Comission di intese cul Ufici scolastic regjonâl, tal regolament di metude in vore di cheste leç e rispietant la autonomie des Istituzions scolastichis dal D.P.R. dai 8 di Març dal 1999, n. 275 (Regolament cun normis in materie di autonomie des istituzions scolastichis, daûr dal art. 21 de Leç dai 15 di Març dal 1997, n. 59)..

ARTICUL 12
Programazion anuâl dal insegnament de lenghe furlane

1. Ogni Istitût al scrîf, cul tacâ di ogni an scolastic, su la fonde de modulistiche prontade de Comission, il Plan anuâl pal insegnament de lenghe furlane segnant in maniere detaiade lis modalitâts par meti in vore lis previsions e i obietîfs dal Plan plurienâl cun riferiment particolâr al an scolastic corint.

2. I Istitûts scolastics a integrin il P.U.F. cu lis indicazions pal insegnament de lenghe furlane tignudis dentri tal Plan anuâl pal insegnament de lenghe furlane.

ARTICUL 13
Regolament di metude in vore

1. La Zonte Regjonâl e cjape il regolament di metude in vore dentri di 120 dîs de jentrade in vore di cheste leç.

2. Gjavant ce che al è previodût daûr dal articul 11 come 3, la Zonte regjonâl e cjape il regolament di metude in vore daûr de propueste de Comission, daspò di vê sintût l'Ufici scolastic regjonâl.

ARTICUL 14
Normis transitoriis

1. In prime aplicazion, pai prins trê agns de jentrade in vore di cheste leç, la Comission dal articul 3 e je costituide dai membris de Comission pai obietîfs didatics istituide li dal Arlef, par garantî une suficiente e necessarie continuitât te sô funzion orientative par judâ la programazion didatiche e organizative des Istituzions scolastichis.

ARTICUL 15
Normis finanziariis

1. Pes finalitâts previodudis dal articul 5 come 3 e je autorizade la spese complessive di … euros, spartide in reson di … euros par ognidun dai agns … , a caric de unitât di prevision di base … … … dal stât di prevision de spese dal belanç plurienâl pai agns … … e dal belanç pal an …, cun riferiment al cjapitul … (…) di gnove istituzion tal document tecnic zontât ai belançs stes.

2. Pes finalitâts previodudis dal articul 9 e je autorizade la spese complessive di … euros, spartide in reson di … euros par ognidun dai agns … , a caric de unitât di prevision di base … … … dal stât di prevision de spese dal belanç plurienâl pai agns … … e dal belanç pal an …, cun riferiment al cjapitul … (…) di gnove istituzion tal document tecnic zontât ai belançs stes.